Türkiyədə FETÖ istintaqı çərçivəsində həbs edilən hərbçi Ömər Qalının məhkəməyə verdiyi ifadə qardaş ölkədə rezonans doğurub.

Axar.az xəbər verir ki, idarə etdiyi tankla 4 nəfəri əzərək öldürən və bir çox şəxsi yaralayan Qalın bunu komandirlərinin əmri ilə etdiyini bildirib. Tankın irəliləyə bilmədiyini söyləyən Qalın deyib:

“Polkovnik Fatih Sönməz “Əz” əmrini verdi. Kapitan Sərdar Dəyirmandərə də məni təhdid etdi. “Qazı bas, cəld hərəkət elə” dedi. Təhdidlərdən sonra tankı sürməyə məcbur oldum. Mən tankla maşınları əzdim, ancaq içərisində insanlar yox idi. Mən görmədim. İnsanlar maşınlardan kənarda dayanmışdı. Tankdan enəndə şokda idim, yerə oturdum və su içdim. Beş ay sonra həbsdə olarkən gələn sənədlə şəhid və qazilərin olduğunu öyrəndim”.

Ömər Qalının ifadəsindən sonra çarpaz sorğuya başlanılıb. İttihamçının “Nəyə görə tankı müvəqqəti olaraq nasaz vəziyyətə salmadın?” sualına müttəhim bunu bacarmadığını deyib.

İstintaq çərçivəsində həbs edilmiş kapitan Sərdar Dəyirmandərənin sualı isə tərəflərin mübahisəsinə səbəb olub. Məhkum kapitanın “Tankı dayandırsan, sənə nəsə edə bilərdim” sualına Qalın belə cavab verib:

“Fatihlə ikiniz əlbir idiniz. Əlinizdə silah var, atəş açırdınız. Mən bir hərbçi kimi həqiqətlərin üzə çıxması üçün əlimdən gələni edirəm. Utanmadan bir də inkar edirsiniz. Allahdan heç qorxmursunuz? Həbsxanadan qorxmaqdansa, Allahdan qorxun”.