Talibanın Moskvada Əfqanıstanla bağlı keçirilən danışıqlarda iştirak etmək haqqında qərarından sonra ABŞ bu təşkilatı bombardman etməyə başladı ki, bu da öz növbəsində İŞİD-in aktivləşməsinə səbəb oldu.

Axar.az xəbər verir ki, bunu “RİA Novosti” agentliyinə açıqlamasında Əfqanıstan parlamentinin Daxili Təhlükəsizlik Komissiyasının üzvü Delavar Aymak deyib.

“Son zamanlar Əfqanıstanın şimalında aktivliyi Taliban yerinə, İŞİD göstərir. ABŞ Talibanı bombardman edir, amma İŞİD-ə toxunmur. Taliban üzvlərinə ya Əfqanıstan ordusuna qatılmaq, ya da İŞİD-ə qoşulmaq təklif edilir. Taliban danışıqlara qoşulmağa hazır olduğunu bəyan etdiyi gündən bu yana ona qarşı əməliyyatlar dayanmır. Əfqanıstan bilir ki, yaranan böhranı özbaşına həll etmək iqtidarında deyil”, – deyə o bildirib.

Qeyd edək ki, bundan öncə Əfqanıstan böhranının həlli üçün Moskvada danışıqların 4 sentyabrda keçirilməsi barədə razılıq əldə olunsa da, sonradan bu tarix Əfqanıstan hökumətinin xahişi ilə təxirə salınmışdı. Tərəflərdən heç kim danışıqların keçiriləcəyi növbəti tarixi açıqlamamışdı.