Böyük Britaniya, Belçika, Fransa, Almaniya, Danimarka, Fransa, Polşa, İspaniya və Hollandiya sərhəd nəzarəti qaydalarının dəyişdirilməsi və gücləndirilməsi fikrindədirlər.

Axar.az "Deyli Teleqraf" qəzetinə istinadən xəbər verir ki, səkkiz Avropa hökuməti Suriya və İraqda islamçılar tərəfdə döyüşən avropalıların vətənə qayıtmasına mane olmaq üçün sərhəd nəzarəti qaydalarını gücləndirmək tələbilə AB rəhbərliyinə müraciət edib.

Qəzet əlində olan sənədə istinadla bildirib ki, ölkələrin təklifi növbəti həftə AB xarici işlər nazirləri tərəfindən müzakirə ediləcək.

"Suriya, İraq və digər münaqişə zonalarında döyüşlərdə iştirak etdikdən sonra Avropaya qayıdan insanları tapıb aşkarlamaq çox vacibdir", - deyə konfidensial sənəddə vurğulanır.

Qəzet yazır ki, hazırda şübhəlilərin terror təşkilatlarının əməliyyatlarında iştirakının yoxlanılması ixtiyari və sistemsiz xarakter daşıyır.

Məlumata görə, hazırda Suriya və İraqda döyüşən üç minə qədər avropalı əlavə yoxlanışsız sərhədi sərbəst şəkildə keçib gedə bilir. "Bu insanların Avropaya qayıtması ilə hücumlar təşkil edilməsi – zamanın məsələsidir. Hökumətlər qorxu içərisindədirlər", – deyə diplomatlardan biri bildirib.