S-400 zenit raket kompleksləri Türkiyəyə iyula qədər tədarük edilə bilər.

Axar.az xəbər verir ki, bunu jurnalistlərə açıqlamasında Türkiyə Prezidenti Rəcəb Tayyib Ərdoğan deyib.

“Bu iş baş çatıb, hər şey hazırdır. S-400-ün tədarükü iyulda baş tutacaq, amma bu, daha tez də baş tuta bilər”, – deyə o bildirib.

Onun sözlərinə görə, S-400 alınmasında əsas məqsəd Türkiyənin milli təhlükəsizliyinin təminatıdır. O, bu sistemlərin üçüncü ölkəyə qarşı istifadə edilməyəcəyini deyib.

Ərdoğan Türkiyənin suveren dövlət olduğu və S-400-lərin alınmasındakı suverenliyini heç kimlə bölüşməyəcəyini söyləyib.

Türkiyə lideri həmçinin ABŞ vitse-prezidenti Mayk Pensin S-400-lərin NATO-nun birliyinə zərər vuracağı açıqlamasını da şərh edib:

“Pensin açıqlamaları önəmli deyil. Pens NATO-nun baş katibi deyil. Stoltenberq artıq özünün bu məsələylə bağlı son sözünü deyib və bunun suveren haqqımız olduğunu söyləyib”.

Suriyanın həlli məsələsinə toxunan Türkiyə Prezidenti tezliklə Astana (Nur-Sultan) prosesinə İordaniya, İraq, Livan, Almaniya və Çinin də qatılacağını deyib. O, bunun sayəsində qəbul edilən qərarlarına beynəlxalq səviyyədə daha güclü olacağını bildirib. Ərdoğanın sözlərinə görə, yaxın zamanlarda Suriya ilə əlaqədar Rusiya, Türkiyə, Fransa və Almaniya liderlərinin ikinci sammiti keçirilə bilər.

Türkiyə Prezidenti Rusiya lideri Vladimir Putinin bunu dəstəklədiyini də ifadə edib.