Əfqanıstan dövləti Vaşinqtondan ABŞ Prezidenti Donald Trampın Əfqanıstanla bağlı sözlərinə aydınlıq gətirməsini tələb edib.

Axar.az xəbər verir ki, bu məlumatı Əfqanıstan Prezidentinin mətbuat xidməti yayıb.

“Əfqanıstanla ABŞ arasında çoxşaxəli münasibətləri nəzərə alaraq, Əfqanıstan diplomatik vasitələr və kanallarla ABŞ Prezidentinin Pakistan Baş naziriylə görüşü zamanı səsləndirdiyi fikirlərə aydınlıq gətirməsini xahiş edir”, – deyə məlumatda bildirilib.

Qeyd edək ki, Tramp Pakistan Baş naziri İmran Xanla görüşü zamanı ABŞ-ın Əfqanıstanı 10 gün ərzində məhv etmək imkanında olduğunu, amma bunu istəmədiyini, çünki bu əməliyyatın 10 milyon insanın ölümünə səbəb olacağını açıqlayıb.