Meksika polisi Kuliakan şəhərində hazırda ABŞ-da həbsdə olan məşhur narkobaron Xoakin Qusmanın oğlunun həbs edilməsi üçün əməliyyat keçirib.

Axar.az xəbər verir ki, polis 28 yaşlı Ovidio Qusman Lopezin qaldığı evi müəyyən etdikdən dərhal sonra hücuma başlayıb. Lopezin saxlanılması xəbərini eşidən narkokartel üzvləri şəhəri əməlli-başlı döyüş meydanına çevirib.

İri çaplı silahlarla silahlanmış kartel üzvləri polisə qarşı hücuma keçib. Ordu qüvvələrinin də yardıma gəlməsinə baxmayaraq, polis geri çəkilmək məcburiyyətində qalıb və narkobaronun oğlunu sərbəst buraxıb.

Təhlükəsizlik qüvvələrinin rəsmisi Alfonso Durazo “Röyter”ə verdiyi açıqlamasında bildirib ki, mülki əhalinin təhlükəsizliyini təmin etmək üçün Lopezi sərbəst buraxmağa məcbur olublar. Silahlılar şəhərin mərkəzində dağıntılar törədib, avtomobilləri yandırıb, yolları bağlayıblar.

Qeyd edək ki, Lopez atası Xoakin Qusmanın həbs olunaraq ABŞ-a ekstradisiya edilməsindən sonra “Sinaloa” kartelində ən nüfuzlu şəxslərdən birinə çevrilmişdi.

Xoakin Qusman ABŞ məhkəməsinin qərarı ilə ömürlük həbsə məhkum olunub.