Türkiyə Nazirlər Kabinetinin iclasından sonra baş nazirin müavini Bülənt Arıncın keçirdiyi mətbuat konfransında onunla bir jurnalist arasında maraqlı dialoq yaşanıb.

Publika.az-ın Türkiyə mediasına istinadən verdiyi məlumata görə, jurnalistlərdən biri "camaat" lideri kimi tanınan Fəthullah Gülənin ölümü ilə bağlı səslənən iddialara baş nazirin münasibətini öyrənmək istəyib.

Jurnalistin "Fəthullah Gülənin 2013-cü il sentyabr ayında öldüyü deyilir. Bu barədə nələr söyləyə bilərsiniz" sualı qarşısında Bülənt Arınç əvvəlcə çaş-baş qalıb, xəbərin mənbəyini soruşduqdan sonra isə "Mənə dərman gətirin" deyib.

Jurnalist və baş nazir arasındakı dialoq aşağıdakı kimi olub:

- "Camaat"ın lideri olaraq tanınan Fəthullah Gülənin 2013-cü ilin sentyabrında öldüyünü söyləyirlər. Deyilənə görə, "camaat"ın dağılmaması üçün bu xəbəri gizlədirlər. Bu barədə nə deyə bilərsiniz?

- Bunu ciddi hesab etmirəm.

- Qəzetlərdə çıxıb.

- Hansı qəzet?

- "Egenin səsi".

- "Egenin səsi"? Yerli qəzetdirmi? İndi xəbərin tamamilə qeyri-ciddi olduğunu anladım.

- Bu qəzet illərdir ki, dərc olunur.

- Aman Allahım, sən ağlımı qoru! Mənə dərman verin. Bu qızımız məni bitirdi.