Ermənistanda ötən gün hökumətin iclası keçirilib. İclasdan sonra erməni iqtisadçıları və ekspertləri maraqlandıqları bir çox suallara cavab tapıb. Amma qaranlıq qalan bir məqamdan başqa.

Axar.az-ın erməni mətbuatına istinadən verdiyi məlumata əsasən, söhbət Ermənistanın dövlət büdcəsindən çıxan 2 milyon dolların hara xərcləndiyindən gedir.

Maraqlısı odur ki, bu pullar sənədlərə əsasən Baş nazirin 2019-cu il ərzində dövlət səviyyəli səfərləri üçün nəzərdə tutulub. Səfərlər üçün əvvəlcə 800 min dollar, bir neçə ay sonra 1 milyon 200 min dollar ayrılıb.

Erməni mətbuatı bununla bağlı belə yazır: “Bu çıxarışlar hamısı sənədlərlə təsdiq olunur, amma məbləğin “şişirdilməsi” ilə əlaqədar heç bir izah verilmir. Niyə əvvəlcədən təyin olunan məbləğ artırılır? Niyə bu, sənədlərdə qeyd olunmur? Nəticədə isə nə az, nə çox - 2 milyon dollar yoxa çıxıb. Bunu ictimaiyyətdən gizlətməyə çalışırlar”.