Türkiyə hərbi inspektorları Rusiyanın Rostov əyalətində hər hansı hərbi fəaliyyət qeydə almayıblar.

Axar.az xəbər verir ki, bu açıqlama ilə Rusiya Müdafiə Nazirliyinin nümayəndəsi Sergey Rıjkov çıxış edib.

O, Türkiyə hərbçilərinin yoxladığı ərazinin 16 min kvadrat kilometr olduğunu bildirib. Rıjkov yoxlamanı türkiyəli polkovnik Murad Dikkasın apardığını deyib.

Qeyd edək ki, Rostov əyalətində 18 min kvadrat kilometrlik digər bir ərazini isə Hollandiya hərbçiləri yoxlayır. Onların yoxlamaları fevralın 20-də başa çatmalıdır. Həmçinin bundan öncə Ukrayna hərbçiləri Rusiyanın Kursk və Belqorod əyalətlərində yoxlamalar aparmışdılar.

Onu da xatırladaq ki, Rostov əyalətindəki yoxlamalar 2011-ci ildə qəbul edilmiş Vyana sənədləri əsasında aparılıb. Bu sənədlərin əsas mahiyyəti ATƏT çərçivəsində gərginliyin azaldılması, etimadın gücləndirilməsi ilə bağlı işlərin həyata keçirilməsidir.