Qondarma Novorossiyanın ideoloqlarından biri, "Strelkov" ləqəbli İqor Qirkin Donbasda müharibənin davam etməsində Rusiya prezidentinin köməkçisi Vladislav Surkovu ittiham edib.

Axar.az xəbər verir ki, Qirkin bunu Serbiya mətbuatına açıqlamasında deyib.

"Surkov hazırki vəziyyətin həqiqi moderatorudur. Və biz Donbası yandırılmış çölə çevirən müharibənin içindəyik. Şübhəsiz, bu onun günahıdır, çünki danışıqlar prosesinə də o rəhbərlik edir", - Qirkin deyib.

Separatçı liderin sözlərinə görə, məhz Surkov Rusiya prezidentinin əmrlərini yerinə yetirmir və Novorossiyanı zərbə altına qoyur.

Bundan başqa Qirkin Kremli onu qondarma Donetsk Xalq Respublikasının rəhbərliyindən uzaqlaşdırmaqda ittiham edib və Rusiyanın Donbasdakı hərbi əməliyyatlarda iştirakını təsdiqləyib.

Qeyd edək ki, Rusiya Prezidentin Vladimir Putinin köməkçisi olan Vladislav Surkov, həm də Kremlin "boz kardinalı" hesab olunur.