"Heydər Camal Rusiyanın siyasi və hakimiyyət dairələrinə çox yaxın biridir və təsadüfi bir insan deyil. Onun açıqlamalarının arxasında müəyyən niyyətlərin durması istisna olunmur".

Bu sözləri Axar.az-a açıqlamasında politoloq Ərəstun Oruclu deyib. Politoloq Heydər Camalın Rusiya prezidenti barədə açıqlamasının arxasında üç mühüm variantın ola biləcəyini açıqlayıb:

"Ola bilsin ki, hər şey Heydər Camalın dediyi kimidir və məhz onun vasitəsilə bu cür məlumatın sızdırılması ilə hansısa planların reallaşdırılmasına çalışırlar. Burada üç mühüm variant var: 1 - Planlar Putinə qarşıdır; 2 - Bu, Putinin öz planı da ola bilər; 3 - Rusiya hakimiyyətinin bütövlükdə bizə bəlli olmayan və təsəvvür etmədiyimiz planları ola bilər. Yəni Rusiya hakimiyyətində qruplararası mübarizənin təzahürü, həm də ümumilikdə Rusiya hakimiyyətinin hansısa bir siyasi gedişinin anonsu da mümkün variantlar içərisindədir. Yayılmış məlumata əsasən, bu gün Rusiya prezidenti Qırğızıstan prezidenti ilə görüşməlidir. Əgər görüş baş tuta, videogörüntülər və şəxsən Putinin özü tərəfindən açıqlamalar verilərsə, o zaman bu, başqa bir məsələ və ya Heydər Camalın şəxsi mülahizələri olacaq. Hər halda yaxın günlərdə situasiya aydınlaşacaq. Ancaq yuxarıda sadaladığım üç variantın heç biri istisna deyil. İstisna etmirəm ki, həqiqətən də Rusiya hakimiyyətində parçalanma var və bu parçalanma nəticəsində bir qrup Vladimir Putini faktiki olaraq neytrallaşdırıb. Bütün bu variantlar mümkündür".

Ə.Oruclunun sözlərinə görə, rus ictimai xadimi və siyasətçisinin bu cür ciddi açıqlamasının prinsip etibarilə dünyanın böyük KİV-lərinin diqqətini çəkməməsinin özü də suallar doğurur:

"Bu qədər böyük rezonansa səbəb ola biləcək bir çıxışın dünya mediasının diqqətindən kənarda qalması maraq doğurmaya bilməz. Baxmayaraq ki, Heydər Camalın bu açıqlamasına Yutub sosial şəbəkəsində yarım milyondan çox baxış olub. Bu, artıq müəyyən mətləblərdən xəbər verir. Dünən belə bir xəbər yayılıb ki, Rusiya səfirliyi Putinin mətbuat katibi Peskovla əlaqə saxlamaq istəsə də, onların zəngləri cavabsız qalıb. Müəmmalar çoxdur. Hər halda yaxın günlərdə situasiya aydınlaşacaq. Hələlik yeganə həqiqət Putinin ortada olmamasıdır. Bu faktdır. Ola bilsin ki, elə bu mülahizələr də məhz buna görə ortaya çıxıb. Qeyd edim ki, FSB direktoru Bortnikovun ABŞ səfəri, Rusiya Təhlükəsizlik Şurasının katibinin Ramzan Kadırovla görüşməsi və Kadırovun Putinin islamı qəbul etməsinə dair absurd məlumat yayması müəmmaları daha da artırır".

Qeyd edək ki, ki, tanınmış rus ictimai xadimi və siyasətçisi Heydər Camal Gürcüstanın "Rustavi 2" telekanalına verdiyi müsahibəsində Vladimir Putinin bir qrup dövlət çevrilişi həyata keçirmək istəyən hərbiçilər tərəfindən nəzarətə götürüldüyünü deyib.