İstanbul Ədalət Sarayındakı qanlı girov əməliyyatından sonra şəhərin Oxmeydanı ərazisində qarışıqlıq yaranıb.

Axar.az Türkiyənin Cihan Xəbər Agentliyinə istinadən xəbər verir ki, icazəsiz aksiya keçirən maskalı şəxslər polisə molotov, fişəng və daşla hücum edib. Polis də bibər qazı ilə müdaxilə edərək etirazçı qrupu dağıtmağa çalışıb.

Xəbər verdiyimiz kimi, prokuror Məhmət Səlim Kirazın girov götürüldüyü İstanbul Ədalət Sarayındakı hadisədə Kiraz həyatını itirmiş, 2 terrorist isə öldürülmüşdü. Bu əməliyyatdan sonra Şişli Mahmud Şevket Paşa məhəlləsinə yığışan maskalı şəxslər Mithat Paşa küçəsində hərəkəti dayandırıb. İcazəsiz nümayiş keçirən qrup polisə molotov bombası, fişəng və daşla hücum edib. Polis isə qrupun həmləsinə bibər qazı və təzyiqli su ilə cavab verib. Polisdən daxil olan məlumata görə, maskalı şəxslər silahdan istifadə edib.

Oxmeydanındakı gərginlik gecə saatlarına qədər davam edib.