Ana səhifə Planet |
İranın 2020-ci ilin ilk ayından etibarən İraqda fəaliyyət göstərən şiə qruplaşmalarına hərbi və maddi köməyi əhəmiyyətli dərəcədə azalıb.
Axar.az “Röyter”ə istinadla xəbər verir ki, COVİD-19 infeksiyasının yayılması nəticəsində yaranan iqtisadi çətinliklər, iki ölkə arasında pandemiya səbəbindən sərhədlərin bağlanması və ABŞ-ın İrana sanksiyalarının daha da şiddətlənməsi bu dəstəyin azalmasının əsas amilləri kimi göstərilir.
Qüds briqadasının komandanı Qasım Süleymaninin öldürülməsinin də İranın sözügedən qruplaşmalara yardım etməsinə ağır zərbə vuran amillərdən olduğu deyilir.
Cari ilin ilk ayından etibarən İranın İraqda fəaliyyət göstərən 4 əsas şiə qruplaşmasına etdiyi maddi yardım aylıq 4.5- 5 milyon dollardan 2-3 milyona, bəzi hallarda isə daha da aşağı düşüb. Halbuki bu rəqəm ABŞ-ın 2018-ci ildə nüvə razılaşmasından çıxaraq, yenidən İrana sanksiyalar tətbiq etməsindən əvvəl aylıq 13-15 milyon dollar arasında dəyişirdi. Hazırda həmin qruplaşmalar hərbi əməliyyatlar keçirmək üçün ehtiyac duyduqları maddi vəsaiti digər yollarla əldə etməyə çalışırlar.
Bəzi məlumatlarda İranın oxşar səbəblərə görə Qəzza zolağında fəaliyyət göstərən Fələstin qruplaşmaları, eləcə də Livan Hizbullahına da maddi və hərbi yardımı kəskin azaltdığı qeyd edilir.
Tarix
2020.07.03 / 23:51
|
Müəllif
Aytac Araz
|