Litvanın Xarici İşlər naziri Linas Linkyaviçyus Yunanıstan Baş naziri Aleksis Çiprasın Rusiya ziyarətinin pərdəarxasını açıqlayıb.

Axar.az xəbər verir ki, Vilnüsün baş diplomatı Moskvanın Afinanı öz tərəfinə çəkməklə Avropa Birliyini parçalamaq niyyətində olduğunu bildirib:

"Hər ölkə öz mənfəəti üçün siyasət yürüdür. Mən ümid edirəm ki, Yunanıstan Avropa Birliyi və NATO üzvlüyünün öhdəliklərinin fərqindədir. Moskvanın Yunanıstana qida məhsullarının idxalı qadağasını qaldırmaq ehtimalı var. Rusiya bu yolla AB-ni bölmək istəyir".

Rusiyanın AB-nin bəzi ölkələri üçün embarqonu aradan qaldırmasının iqtisadi deyil, siyasi gediş olduğunu deyən Linkyaviçyus ittifaq ölkələrinə xəbərdarlıq edib:

"Avropa Birliyi öz maraqlarını təmsil etmək məqsədilə lazım olduğu kimi davranmalıdır. Xüsusilə də ticarət mövzusunda. Hər şey beynəlxalq razılaşmalar və standartlar çərçivəsində gerçəkləşməlidir. Yoxsa bəziləri bizi öz normalarına uyğun bölməyi qarşısına məqsəd qoyub. Buna icazə verməməliyik".