Ukrayna Belorus ilə yeni raket hazırlayır.

Axar.az xəbər verir ki, bu açıqlama ilə Ukrayna Milli Təhlükəsizlik və Müdafiə Şurasının katibi Aleksandr Turçinov çıxış edib. O, yeni raketlərin Belorusla birgə hazırlanacağını bildirib:

"Ölkədəki müharibəyə baxmayaraq, bizim Belorusla hərbi əməkdaşlığımız azalmayıb. Dnepropetrovskdakı "Yujnoye" zavodunda biz "Sapsan" raketlərinin hazırlanmasına başlamışıq. Onların 2017-ci ildə təhvil veriləcəyini proqnozlaşdırırıq. İlkin olaraq 200 raket buraxmaq istəyirik. Onlar keyfiyyət baxımından "İsgəndər" raketlərindən daha yüngül və daha keyfiyyətlidirlər. Həm də ucuz başa gəlir".

Qeyd edək ki, 1990-2000-ci illərdə Ukraynada olan raket ehtiyatlarının hamısı ləğv edilmişdi. Ölkədə yalnız 90 kilometr məsafəni vurmaq qabiliyyətinə malik olan "Toçka-U" raketləri qalmışdı. "Sapsan" raketlərinin hazırlanması ilə bağlı iş 2006-cı ildən başlamışdı. Layihəyə əsasən onlar 2011-ci ildə ordunun hərbi arsenalına keçməli idi. Lakin 2013-cü ildə layihə rəsmən dayandırıldı və bütün proyektlər ləğv edildi.

Onu da xatırladaq ki, "Yujnoye" zavodunda həmçinin dünyanın ən güclü raketi olan P-36M "Satana" hazırlanmışdı.