Ukrayna Belarusdakı səfiri İqor Kizimin avtomobilində aparılan axtarışla bağlı insident səbəbindən Belarus Xarici İşlər Nazirliyinə nota göndərib.

Axar.az xəbər verir ki, notada Belarus sərhədçilərinin bu olaya aydınlıq gətirməsi və onların hərəkətlərinin izah edilməsi tələb edilib.

Bildirilib ki, Belarusda səfirə qarşı bu addım ölkələrarası dostluq münasibətlərə ziddir.

Qeyd edək ki, səfiri bir müddət öncə konsultasiya məqsədilə Ukrayna XİN ölkəyə çağırmışdı. Diplomat şəxsi avtomobili ilə Belarus sərhədindən keçən zaman sərhədçilər ondan avtomobilinin yük yerini açmasını və şəxsi əşyalarını göstərməsini tələb ediblər. Səfirin sözlərinə görə, 27 illik fəaliyyəti ərzində bu cür münasibətlə qarşılaşmayıb.

Kizim bildirib ki, son aylarda Belarusda baş verən hadisələr iki ölkə arasındakı etibarlı münasibətlərə təsir edib. Belarus Sərhəd Xidməti isə səfirin iddialarını rədd edərək, sadəcə maşına baxış keçirildiyini açıqlayıb.

Onu da əlavə edək ki, ötən gün səfir Rusiya və Belarus yaxınlaşmasından narahat olduqlarını açıqlamışdı.