Hindistanda Jagendra Singh adlı jurnalist Ram Murt Verma adlı siyasətçini Feysbukda tənqid etdiyinə görə diri-diri yandırılıb.

Axar.az xəbər verir ki, jurnalist ictimai media hesabında Vermanı vəzifəsindən sui-istifadədə və ərazi oğurlamaqla ittiham edib.

"İndependent" qəzetinin məlumatına görə, Uttar Pradeş ştatının nazirlərindən biri olan Verma hadisədən sonra beş nəfərlə birgə həbs olunub.

Singhin qohumları isə cinayətin polis tərəfindən gizlədildiyini iddia edir. Onların sözlərinə görə, jurnalisti həbs etməyə gələn polislər onu diri-diri yandırıb:

"Müfəttiş və digər polislər otağa girdi və Singhin üstünə benzin töküb yandırdılar".

İBN Live-ə danışan Şahcahanpur şəhər polisi səslənən ittihamları rədd edərək jurnalistin intihar etdiyini açıqlayıb:

"Jagendra Singh haqqında bir iddia vardı. Onu həbs etməyə çalışdıq. Amma intihar etdi".