"Türkiyə heç vaxt özünün cənub sərhədlərində yerləşən Suriyada kürd dövlətinin yaradılmasına izn verməyəcək".

Axar.az xəbər verir ki, bu açıqlama ilə Türkiyə Prezidenti Rəcəb Tayyib Ərdoğan çıxış edib. Onun sözlərinə görə, Ankara bu planın reallaşmaması üçün bütün imkanlarından istifadə edəcək.

Qeyd edək ki, hazırda Suriyanın şimalındakı kürdlər İŞİD-ə qarşı əsas mübarizə aparan qüvvə hesab edilir. Türkiyə buradakı kürdlərə aid PYD-ni PKK-nın qanadı hesab etdiyinə görə, onu dəstəkləmir. Qərb isə əksinə kürdlərdən İŞİD-ə qarşı bütün hücumlarda yararlanır.