Vahid Milli Hərəkat Partiyası və onun tərəfdaşları yerli hökumət orqanlarında yer almaqla bağlı hələlik qərar qəbul etməyiblər.

Axar.az xəbər verir ki, bunu partiyanın liderlərindən olan Xatiya Dekanoidze deyib.

“Biz hələ prosedur məsələləri müzakirə etməmişik. Bu qərarı bütün komanda verməlidir”, - Dekanoidze bildirib.

Dekanoidze müxalifətin bütün yerli hökumət orqanlarında qalmasının tərəfdarı olduğunu deyib.

Bu arada xırda partiyalar da öz təkliflərini irəli sürməyə başlayıblar.

Xalq üçün Partiyasının lideri Anna Dolidze müxalifətin çoxluq təşkil etdiyi yerli hökumət orqanlarında Gürcü Arzusundan olan merlərə qarşı impiçment elan etməyi təklif edib.

“Biz müxalifətə “Xalq impiçmenti” adını verdiyimiz fəaliyyət planını təklif edirik”, - Dolidze bildirib.

Qeyd edək ki, müxalifət partiyaları, ümumilikdə, Rustavi, Batumi, Zuqdidi, Tsalenjixa, Çxorotsxu və Senaki yerli hökumət orqanlarında çoxluğa malikdirlər. Eyni zamanda, Milli Hərəkat Partiyası yalnız Zuqdidi və Senakidə çoxluğa malikdir. Digər regionlarda onun çoxluğu Gürcüstanın keçmiş baş naziri Georgi Qaxariyanın Gürcüstan Naminə Partiyasından asılıdır.

Bununla belə, impiçment elan etmək üçün müxalifətə yerli hökumət orqanlarındakı deputatların üçdə ikisinin razılığı lazımdır. Amma müxalifətin yalnız Zuqdididə və Qaxariyanın partiyasının köməyi ilə belə sayda tərəfdarı var.