Türkiyədə koalisiya hökuməti qurmaq məqsədilə dünən Cümhuriyyət Xalq Partiyası (CHP) lideri Kamal Kılıcdaroğlu ilə Ədalət və İnkişaf Partiyasının (AKP) sədri Əhməd Davudoğlu arasındakı görüşün nəticəsiz başa çatdığı bildirilib.

Axar.az xəbər verir ki, Türkiyə Nazirlər Kabinetinin iqamətgahında ötən gün saat 18:00-da baş tutan görüş təxminən 4 saat 20 dəqiqə davam edib. Türk ictimaiyyətinin böyük diqqətlə izlədiyi görüş sonrası isə mediaya heç bir açıqlama verilmədi.

Bu gün səhər yayılan məlumata görə, tərəflər arasında bu həftə ərzində yenidən görüşmək barədə razılıq əldə olunub. Bu isə görüşün nəticəsiz bitdiyi, razılaşmanın əldə olunmadığını deməyə əsas verir. Ehtimal edilir ki, növbəti görüş həlledici olacaq.

Türkiyə Mədəniyyət və Turizm naziri Ömər Çelik görüşün məqsədinin Türkiyə üçün ən yaxşı formul tapmaq olduğunu deyib:

"Buradakı istək Türkiyə üçün ən yaxşı formul tapmaqdır. Türkiyə, millətimiz üçün ən yaxşı formul tapa bilmək məsələsində səmimi səylər var, amma bunun koalisiya və ya başqa bir şey olacağını son nəticədə görəcəyik".