Qərb terrorizmlə mübarizədə Rusiyanın hərbi yardımını qəbul etsə belə, bu, Əsəd rejimini xilas etməyəcək.

Axar.az xəbər verir ki, bunu "Novaya qazeta"ya müsahibəsində Pavel Felgenhauer söyləyib. Onun sözlərinə görə, Rusiyanın Suriyada savaşa girməsi dünya nizamı üçün yeni qaydaların müəyyənləşdirilməsinə səbəb olmayacaq:

"Moskva var gücü ilə özünün Suriyaya hücuma hazırlaşdığını göstərməyə çalışır. Bu hücum vətəndaş müharibəsinin gedişində Bəşər Əsəd rejimini və onun şiə müttəfiqlərini uğursuzluq zolağından çıxarmalıdır. Rusiyanın Suriyada hərbi texnika yerləşdirməsi ilə bağlı informasiyalar qəsdən təşkil edilib. Bütün bunlar Rusiyanın keçmiş müttəfiqini xilas etməyə hesablanıb. Eyni zamanda həmin informasiyalar Qərblə ümumi qarşıdurma səviyyəsini aşağı salmalıdır. Rusiyanın Suriyaya girməsi ilə bağlı xəbərlər ABŞ Administrasiyasında ciddi fikir ayrılığına səbəb oldu. Hələlik Obama tərəfindən dəstəklənən Kerrinin nöqteyi-nəzəri bu qarşıdurmalarda qalib gəlir. Amerikanın bölgədəki siyasəti artıq dalana dirənib. Vaşinqton isə Obamanın strategiyasının iradəsizliyindən narazıdır. Putin də öz növbəsində İŞİD-ə qarşı geniş koalisiya yaratmağı təklif edir. Kreml bununla da Qərblə Rusiya arasındakı konflikti söndürməyi planlaşdırır. Qısası, Rusiya yeni Yalta müqaviləsi imzalamağa çalışır. İŞİD, suriyalı qaçqınların Avropaya axını Rusiyanı hələlik öz məqsədlərinə sürətlə yaxınlaşdırır. Əgər Yaxın Şərqdəki konflikt ocaqları söndürülməzsə, onun əhatə dairəsi genişlənəcək".

Xatırladaq ki, Yalta konfransı 1945-ci ilin fevralında baş tutub. Konfransda dövrün mühüm lideri SSRİ rəhbəri Stalin, Böyük Britaniya Baş naziri Çörçil və ABŞ Prezidenti Ruzvelt iştirak edib. Konfransda tərəflər Polşa, Almaniyanın bölüşdürülməsi və SSRİ-nin Yaponiya İmperatorluğuna qarşı savaş elan etməsini müəyyənləşdirmişdilər. Məhz bu konfrans və orada qəbul edilən qərar II Dünya müharibəsindən sonra qlobal güclər arasında balansı müəyyən edən əsas amillərdən biri olmuşdu.