Kremlin Suriya konfliktinə girməsi bu regionu öz nəzarəti altında tutmaq istəməsilə əlaqədardır.

Axar.az xəbər verir ki, bunu Ukrayna mətbuatına açıqlamasında ukraynalı politoloq Sergey Krıjanovski söyləyib. Onun sözlərinə görə, bir müddət öncə müxalif qüvvələrin rus təyyarələri tərəfindən bombardman edilməsi Qərbə Suriyada kimin ağa olmasını göstərməkdir.

"Ən vacib məsələ budur ki, Yaxın Şərq konfliktində də Ukraynada olduğu kimi Rusiya və ABŞ tərəfindən nüvə silahının tətbiqi ilə bağlı məsələlər ortaya çıxa bilər. Bundan başqa İran məcbur edilə bilər ki, nüvə bombası hazırlığını davam etdirsin. Əgər Əsəd savaşdan qalib çıxsa, İran Əfqanıstandan Aralıq dənizinə qədər bütöv bir ərazini öz nəzarəti altına keçirəcək. Bu isə Səudiyyə Ərəbistanının maraqlarına cavab vermir. Üstəlik, dünyəvi Suriyada İranın təsirinin artması onun gələcəkdə əvvəlki kimi qalacağına da ümidi öldürür. Maraqlıdır ki, Rusiya Federasiya Şurası rus ordusunun Suriyada yox, məhz xaricdə istifadə edilməsi haqqında qərar çıxarıb".