Rusiyadan gələn qaz kəməri vasitəsilə tranzit artırılsa belə, Azərbaycan Gürcüstanın əsas qaz təchizatçısı kimi qalacaq.

Axar.az xəbər verir ki, bunu Gürcüstan mətbuatına açıqlamasında Gürcüstan baş nazirinin Rusiya ilə münasibətlərin həll edilməsi üzrə xüsusi nümayəndəsi Zurab Abaşidze söyləyib. Onun sözlərinə görə, Gürcüstan 2007-ci ildən bu yana Rusiyadan qaz almır:

"Bizim əsas təchizatçımız Azərbaycandır. Bundan başqa biz yalnız Ermənistana tranzit olunan qazın ümumi həcminin 10%-ni Rusiyadan alırıq. Əgər həcm artırılsa, biz onlardan daha çox alacağıq. Məncə, burada pis heç nə yoxdur. Azərbaycan bu sahədə bizim strateji partnyorumuz kimi qalacaq".

Qeyd edək ki, bundan öncə Gürcüstanın Energetika naziri Kaxa Kaladze enerji mənbələrinin diversifikasiya olunacağını bildirmişdi. O, Tiflisin Rusiyadan qaz ixracını artıracağını söyləmişdi.