Minada zəvvarların kütləvi ölümü ilə nəticələnən hadisədən sonra Tehran-Ər Riyad münasibətlərindəki gərginlik pik həddə çatıb.

Axar.az xəbər verir ki, vəziyyət o qədər gərginləşib ki, iki ölkə arasında hərbi qarşıdurma ehtimalı yaranıb.

Yaxın Şərqin iki güclü ölkəsi arasında yarana biləcək qarşıdurmanı qiymətləndirən ekspertlər Tehranın başlıca məqsədinin hərbi əməliyyatlara başlamaq yox, daxildəki etirazı cilovlamaq olduğunu bildirir. Eyni zamanda Qərb ilə əldə olunan nüvə razılığı, Rusiyanın Suriyaya girməsi İranın bölgədə daha aktiv mövqe sərgiləməsinə şərait yaradır.

İranın tanınmış hərbi mütəxəssislərdən olan Əhməd İbrahimi Tehranın ard-arda Yaxın Şərqdə böyük zərbələr aldığını deyib:

"Tehranın hədəfi Səudiyyə Ərəbistanının bölgədəki fəaliyyətinə mane olmaqdır. Yəmənə silah daşıyan İran gəmisinin saxlanılması, İran təyyarələrinin Yəmənə enişinə Səudiyyə liderliyindəki koalisiya tərəfindən maneə törədilməsi, İran səfirliyinin Bəhreyndən deportasiya edilməsi və Küveytdə İranla əlaqələri olduğu deyilən bir neçə şəxsin həbs olunması Tehranı özündən çıxarıb. Bu hadisələrdən sonra Minadakı hadisə İran üçün yaxşı bəhanə oldu. İranın Ərəb ölkələrinin Yəmənə hücumundan sonra bölgədəki hegemoniyası davamlı olaraq geriləyib. Bu müddətdə Tehran İraq, Bəhreyn, Yəmən və Livanda çox şey itirdiyini hiss edir. Buna görə, islam ölkəsinin belə reaksiyası əslində təbiidir".

Tehran Universitetinin siyasi elmlər üzrə professoru və sabiq millət vəkili Cəlal Cəlalzadə İranın Səudiyyə Ərəbistanına qarşı hücum planının olmadığını deyib:

"İranın hücum niyyəti və gücü yoxdur. Çünki bu hücum bütün İslam aləminin reaksiyasına səbəb ola bilər. Ayrıca, İran iqtisadi cəhətdən yaxşı vəziyyətdə deyil. Digər tərəfdən belə bir hücum ABŞ və Səudiyyə Ərəbistanının müttəfiqlərini adekvat addım atmağa təhrik edəcək. Bu səbəbdən səslənən təhdidlər daha çox daxili ictimaiyyətə yönəlib. Rusiyanın bölgəyə gəlməsi hər şeyi dəyişdi. İran Rusiyanın böyük dəstəyindən sonra sərt bəyanatlar verməyə başladı. Hazırda heç kim Rusiyanın Suriyada nə qədər qalacağını bilmir. Buna görə də İran Yəmən, Suriya və İraqdakı hərbi məğlubiyyətlərindən sonra yeni strategiya hazırlamalıdır".