Ukraynada Ali Radanın deputatı Yevgeni Şevçenko dövlətə xəyanətdə ittiham olunub.

Axar.az xəbər verir ki, bu barədə Ukrayna Təhlükəsizlik Xidmətinin (SBU) Teleqram kanalında məlumat verilib.

“Təhlükəsizlik Xidməti, Dövlət İstintaq Bürosu və Baş Prokurorluq Ukraynanın hazırkı deputatının dövlətə xəyanətinə dair sübutlar toplayıb”, - bəyanatda deyilir.

Hüquq-mühafizə orqanları deputatın adını açıqlamayıblar. Ancaq Vladimir Zelenskinin Ofisinin rəhbərinin müşaviri Sergey Leşşenkonun Teleqram kanalında verdiyi məlumata görə, söhbət deputat Yevgeni Şevçenkodan gedir.

İş materiallarına görə, Şevçenko 2024-cü ilin oktyabr-noyabr aylarında Rusiya Federasiyasının maraqları naminə məlumat və təxribat fəaliyyəti ilə məşğul olub, Ukrayna müdafiə qüvvələrinin komandanlığı və ölkə daxilində ictimai əhval-ruhiyyə haqqında təhrif olunmuş məlumatlar yayıb.

Qeyd edək ki, Yevgeni Şevçenko Radanın müstəqil üzvüdür. 2021-ci ildə o, Belarus lideri Aleksandr Lukaşenko ilə görüşdən sonra Xalqın Xidmətçisi Partiyasının parlament fraksiyasından xaric edilib.