08:35

Vaşinqtonun Reyqan Milli Hava Limanında sərnişin təyyarəsi ilə “Blackhawk” helikopteri toqquşub.

Axar.az xəbər verir ki, bu barədə CNN məlumat yayıb.

Məlumata görə, təyyarənin göyərtəsində 60 sərnişin olub.

“NBC Nyus”da isə qəzaya uğrayan təyyarədə azı 4 nəfərin sağ qaldığı, onların xəstəxanaya aparıldığı vurğulanıb.

“Röyters“ helikopterdə 3 hərbçinin olduğunu açıqlayıb.

FTB-nin Vaşinqtondakı yüksək rütbəli rəsmisinin sözlərinə görə, baş verən hadisədə terror əlaməti yoxdur.

***

Hərbi helikopterlə toqquşan sərnişin təyyarəsinin düşdüyü Potomak çayından 19 nəfərin meyiti çıxarılıb.

Bu barədə BNO portalı polisə istinadən məlumat yayıb.

ABŞ müdafiə naziri Pit Heqset qəzaya uğrayan təyyarə ilə bağlı araşdırmaya başlanıldığını açıqlayıb.

***

Vaşinqtonda hərbi helikopterlə sərnişin təyyarəsinin toqquşması nəticəsində 30-dan çox insan həlak olub.

Bu barədə xilasetmə işlərinin gedişatı ilə tanış olan iki mənbə “NBC Vaşinqton” telekanalına məlumat verib.

Məlumata görə, ölənlərin meyiti çaydan çıxarılıb.