ABŞ-ın vitse-prezidenti Ceyms Devid Vens Münhen Təhlükəsizlik Konfransında Almaniya kansleri Olaf Şoltsla görüşməyəcək.

Axar.az xəbər verir ki, bu barədə “Politiko” məlumat yayıb.

“Bu, Ukrayna ilə potensial sülh sazişi ərəfəsində transatlantik gərginliyin artdığı bir vaxtda ev sahibi ölkə rəhbərinə ciddi diplomatik qınaqdır”, - məlumatda deyilir.

ABŞ-ın sabiq rəsmisi nəşrə anonim olaraq bildirib ki, Vens heç vaxt Münhendə Şoltsla görüşməyi planlaşdırmayıb:

“Onu görməyə ehtiyacımız yoxdur, o, uzun müddət kansler olmayacaq”.

Eyni zamanda adının açıqlanmasını istəməyən alman rəsmisi bunun ölkəyə qarşı hörmətsizlik olduğunu vurğulayıb:

“Şoltsa tab gətirə bilmirəm, amma o, hələ də bizim kanslerdir. Bu o deməkdir ki, Tramp administrasiyası müttəfiqləri ilə maraqlanmır”.