Kreml Ukrayna ordusunu nüfuzdan salmaq, Qərbin Ukraynaya dəstəyini zəiflətmək və ABŞ Prezidenti Donald Trampın rusiyalı həmkarı Vladimir Putinə təklif etdiyi 30 günlük atəşkəs danışıqlarını pozmaq məqsədilə ukraynalı hərbçiləri Kursk vilayətində hərbi cinayətlər törətməkdə suçlayacaq.

Axar.az xəbər verir ki, bu barədə ABŞ-ın Müharibənin Öyrənilməsi İnstitutunun hesabatında qeyd olunub.

Ekspertlər qeyd edib ki, Putin, habelə Rusiya dövlət mediası və təbliğatçıları 2025-ci ilin fevral ayının sonundan etibarən Ukrayna hərbçilərini Kursk vilayətində dinc sakinlərin edam edilməsi və terrorçuluq da daxil olmaqla, hərbi cinayətlər törətməkdə daha davamlı ittiham etməyə başlayıblar.

Hesabatda Putinin bu hekayədən Ukraynada atəşkəsdən imtina etmək və döyüş meydanında Ukrayna hərbçiləri ilə qəddar rəftarı əsaslandırmaq üçün istifadə etmək niyyətində olduğu ehtimal edilir. Təhlilçilər 2024-cü ildə və 2025-ci ilin əvvəlində döyüş meydanında Ukrayna hərbi əsirlərinin edam edilməsi hallarının artdığını, bunun ehtimal ki, Rusiya hərbi komandanlığının əmri ilə baş verdiyini xatırladırlar. Həmçinin martın 13-də Suca şəhəri yaxınlığında Rusiya qoşunları tərəfindən Ukrayna hərbi əsirlərinin edam edilməsi barədə məlumatlar var.