Rusiya və ABŞ prezidentlərinə Səudiyyə Ərəbistanında keçirilmiş danışıqların nəticələri barədə məlumat verilib.

Axar.az xəbər verir ki, bu barədə Rusiyanın xarici işlər naziri Sergey Lavrov "Birinci kanal"a müsahibəsində bildirib.

Onun sözlərinə görə, ABŞ və Rusiya Ər-Riyadda keçirilən danışıqlarda Qara dənizdə gəmiçiliyin təhlükəsizliyini müzakirə ediblər:

"Rusiya Qara dəniz təşəbbüsünün bərpasının tərəfdarıdır, lakin hamı üçün daha məqbul formada. Moskva yeni sülh təşəbbüsündə ikimənalılığın olmamasında və Rusiyanın aydın zəmanətlərə malik olmasında israr edir.

Moskva istəyir ki, heç kim onu taxıl və gübrə bazarından uzaqlaşdırmağa çalışmasın”.

Qeyd edək ki, Rusiya və ABŞ rəsmiləri arasında Ər-Riyadda görüş ötən gün baş tutub və 13 saata yaxın davam edib.