AB İstanbul meri Əkrəm İmamoğlunun həbsi və ondan sonrakı etirazlar fonunda çox güman ki, Türkiyəyə qarşı sərt mövqe tutmayacaq, çünki bu ölkəni mühüm müttəfiq hesab edir.

Axar.az xəbər verir ki, bu barədə “Politiko” nəşri mənbələrə istinadən məlumat yayıb.

“AB Türkiyənin miqrasiya, ticarət, müdafiə və enerji sahələrində ən mühüm tərəfdaşı hesab etdiyi üçün ölkədəki siyasi vəziyyətə o qədər də əhəmiyyət verməyə bilər. İcma Türkiyəyə milyardlarla dollarlıq subsidiyalar ayırır, xüsusən də ölkə Yaxın Şərqdən olan qaçqınların yerləşdirilməsi üçün təxminən 9 milyard avro yardım alıb. Avropa Komissiyasının məlumatına görə, 2023-cü ilin sonunda Brüssel və Ankara arasında ikitərəfli ticarətin həcmi təxminən 206 milyard avro təşkil edib. AB-nin Müdafiə üzrə Ağ Kitabına əsasən, Türkiyə Birliyə namizəd ölkə kimi cəmiyyətin müdafiə xərclərini artırmaq üçün nəzərdə tutulan fondlardan 800 milyard avroluq birgə hərbi satınalmalara çıxış əldə edə bilər”, - məlumatda qeyd olunub.