Serbiya Prezidenti Aleksandar Vuçiç Rusiya lideri Vladimir Putinlə 2021-ci ildən bəri görüşmədiyini, lakin onunla gizli əlaqə saxlayan ən azı iki dünya liderini tanıdığını bildirib.

Axar.az xəbər verir ki, Vuçiç bu barədə bloger Mario Naufalla müsahibəsində deyib.

Blogerin bu şəxslərin 2024-cü ildə Putinlə görüşən Viktor Orban və Robert Fitso olub-olmaması ilə bağlı sualına Vuçiç “yox” cavabını verib.

Vuçiçin sözlərinə görə, Putini üç il yarımdır görmür və bu müddət ərzində ilk dəfə onu mayın 9-da Böyük Vətən Müharibəsində Qələbənin 80-ci ildönümünün qeyd olunması şərəfinə Moskvada keçiriləcək tədbirdə görəcək.

Qeyd edək ki, Serbiya Rusiyanın Ukraynada keçirdiyi hərbi əməliyyatı pisləsə də, Rusiya əleyhinə sanksiyalara qoşulmayıb.