İsrailin ölkə daxilinə endirdiyi ölümcül hava zərbələri Suriyanın suverenliyinin kobud şəkildə pozulması deməkdir.

Axar.az xəbər verir ki, bu barədə Suriya Xarici İşlər Nazirliyinin açıqlamasında bildirilib.

“İsrail qüvvələri beynəlxalq hüququ və Suriyanın suverenliyini açıq-aşkar pozaraq, ölkənin 5 məntəqəsinə hava zərbələri endirib. Bu əsassız eskalasiya Suriyada sabitliyi pozmaq üçün məqsədyönlü cəhddir”, - məlumatda vurğulanıb.

Qeyd edilib ki, zərbələr Həma əyalətindəki hərbi hava limanının tamamilə dağıdılması ilə nəticələnib, onlarla mülki şəxs və hərbçi yaralanıb, 10 nəfər həlak olub.

Suriya XİN zərbələrin ölkənin 14 illik müharibədən sonra yenidən qurulmağa çalışıldığı bir vaxtda baş verdiyini vurğulayıb və bunu “ölkə daxilində zorakılığı adiləşdirmək strategiyası” adlandırıb.

İsrail Müdafiə Nazirliyinin açıqlamasına görə, bir neçə silahlı şəxs gecə saatlarında Suriyanın cənubundakı Tasil şəhərində yerləşən İsrail əsgərlərinə atəş açıb. İsrail hərbçiləri bundan sonra cavab atəşi açıb və bir neçə silahlı şəxsi yerdən və havadan məhv ediblər.

Xatırladaq ki, Tasil İsrail-Suriya sərhədi boyunca silahsızlaşdırılmış bufer zonasından kənarda yerləşir.