Vladimir Zelenski ABŞ-la resurslarla bağlı yeni saziş layihəsinin detalları barədə mediaya məlumat ötürə biləcək ukraynalı məmurların yalan detektoru yoxlamasından keçirilməsini tapşırıb.

Axar.az xəbər verir ki, bu barədə məlumatı “Faynənşl Tayms” Ukrayna hökumətindəki mənbələrə istinadən yazıb.

Qeyd olunub ki, artıq bir neçə nazirliyin əməkdaşları bu cür yoxlamalardan keçib. Ukrayna Prezident Ofisi bu xəbərləri şərh etməkdən imtina edib.

Məlumata görə, məlumat sızmasının mənbəyini tapmaq cəhdləri Vaşinqtonla Kiyev arasında münasibətlərin növbəti dəfə gərginləşməsi fonunda başlayıb. FT-nin həmsöhbətlərinin sözlərinə görə, sazişin yeni versiyasında ABŞ-ın irəli sürdüyü tələblər Ukrayna rəhbərliyini qəfil yaxalayıb.

Qeyd edək ki, 27 martda Kiyev Vaşinqtondan sənədin yeni versiyasını aldığını açıqlayıb. Sənəd FT də daxil olmaqla, bir sıra KİV-in və ukraynalı müxalifət deputatı Yaroslav Jeleznyakın əlinə keçib, bu isə Zelenskinin narazılığına səbəb olub.