İsti havalarda restoranlarda zəhərlənmə halları daha çox müşahidə edilir. Çox miqdarda hazırlanan, xüsusilə də soyuducuda saxlanılması vacib olan yüksək risk qrupuna daxil qidaların açıq havada qalması onların tərkibinin pozulmasına səbəb olur ki, bu da zəhərlənmələrə gətirib çıxarır.

Bu sözləri Axar.az-a açıqlamasında qida eksperti Məhsəti Hüseynova zəhərlənmə halları ilə bağlı danışarkən deyib.

Mütəxəssis bildirib ki, yüksək risk qrupundan olan qidalar süfrəyə verilməzdən saatlarla öncə hazırlanarsa, bu, əlavə risk yaradar:

“Yüksək risk qruplu qidalara mayonezli salatları misal göstərmək olar. Yaxşı olar ki, bu kimi qidaların istehlakı yay fəslində azaldılsın və salat süfrəyə verilən zaman qarışdırılsın. Məclislərdə isə salatlar öncədən hazırlanır, bir neçə saat əvvəl masalara düzülür. Bu isə qidanın tərkibinin dəyişməsinə səbəb olur.

Bundan əlavə, mayonezlərin istifadə müddəti 3-6 aydır. Ancaq bu müddət ağzı açılmayan mayonezlərə aiddir. Ağzı açıldıqdan sonra qısa müddətdə istifadə edilməlidir, əks halda vaxtı keçmiş məhsul hesab olunur”.

Ekspertin sözlərinə görə, müxtəlif yeməklərin birgə qəbulu da təhlükəlidir:

“Qarışıq yeməklərin, bir-birinə uyğun olmayan qidaların qəbulu həzm sisteminin çətinləşməsinə, hətta sağlamlıq probleminə gətirib çıxarır. Bir neçə çeşid ət yeməyinin eyni anda istifadə olunması da yolverilməzdir. Həmçinin bəzi tərəvəzlər də var ki, onların çiy halda paxlalılarla birlikdə yeyilməsi mədə-bağırsaq sisteminin funksiyasını poza bilər.

Qızartma yeməklərə gəldikdə isə həmin qidanın yeni hazırlandığına diqqət edilməsi məqsədəuyğundur.

İçkilər də bəzən təhlükə yarada bilir. Çünki qidalarla birlikdə rəngli və qazlı içkilərdən istifadə etmək vəziyyəti daha da ağırlaşdırır”.