Bəstəkar mahnısının bir yox, bir neçə müğənni tərəfindən ifa olunmasına yalnız sevinməlidir. Çünki mahnılar xalq üçün yazılır.

Bu sözləri Kult.az-a açıqlamasında əməkdar mədəniyyət işçisi, bəstəkar Rauf Məmmədov Cənubi Azərbaycandan olan bəstəkar Mənsur Daneşvarın “Nazlanma” mahnısının ifasına görə Vasif Məhərrəmli və Vəfa Şərifova sərt etirazı haqda danışarkən deyib.

“Sadəcə, mənim yeganə iradım odur ki, mahnılar ifa edilərkən mütləq müəlliflərin adları qeyd olunmalıdır. Amma bəzi bəstəkarlar fərqli düşünür və ifadən öncə izn alınmasını istəyir. Əgər bəstəkar mahnısının ifası üçün icazə alınmasını tələb edirsə, onun fikrinə hörmətlə yanaşılmalıdır. Şəxsən mən bu düşüncədə deyiləm. Kimsə mənim mahnılarımı ifa etmək istəyirsə, daha da sevinərəm”, - o bildirib.

Bəstəkar fars musiqisinə böyük hörmətlə yanaşdığını, lakin milli musiqidə xarici melodiyalardan istifadənin tərəfdarı olmadığını vurğulayıb:

“Müğənnilərimiz fars musiqilərini və ya bu ritmdə yazılan mahnıları keçmişdə də ifa ediblər. Hazırda da bir çox mahnıda hind, fars və digər millətlərin melodiyalarını duymaq mümkündür. Mən bunun əleyhinəyəm. Mahnılarımızda milli melodiyalardan istifadə olunsa və milli musiqimiz ifa edilsə, daha faydalı olar”.