Həddindən artıq şəkər qəbulu çox vaxt xarici görünüşdə müşahidə olunan bəzi dəyişikliklərin səbəbkarıdır.

Axar.az Medicina.az-a istinadən xəbər verir ki, qastroenteroloq Dilyara Lebedeva kollagenin qlikasiyasını tətikləyərək qocalma prosesini sürətləndirən qidaları açıqlayıb.

O, dərinin möhkəm və hamar qalması üçün vacib zülal olan kollagenin "qlikasiyası" adlanan prosesə diqqət çəkib. Şəkərlə zəngin qidalar böyük miqdarda qəbul edildikdə, kollagen "şəkərlənir" (qlikasiyaya uğrayır), bu da onun strukturunu dəyişdirir və parçalanmasına gətirib çıxarır. Nəticədə dərinin keyfiyyəti əhəmiyyətli dərəcədə pisləşir. Bir sözlə, şirin qidalar kollagenin qlikasiyasına və bununla da qocalmaya səbəb olur:

"Qırışlar, möhkəmliyin itirilməsi, üz konturlarının sallanması, hiperpiqmentasiya, genişlənmiş kapillyarlar və şişkinlik – bütün bunlar kollagenin 'şəkərlənməsi' və ya qlikasiyası nəticəsində baş verir. Əslində, kollagen 'qlikasiyanın son məhsulları' (AGE-lər) tərəfindən məhv edilir".

Qeyd olunub ki, şirniyyatlardan və tərkibində AGE-lər olan məhsullardan imtina etmək lazımdır. Xüsusilə, mütəxəssis qızardılmış kartof və inqrediyentləri üzərində qabıq əmələ gələnə qədər qızardılmış yeməklərin yeyilməməsini tövsiyə edir. Həmçinin çörək qabıqlarını yeməkdən də çəkinmək lazımdır. Ən yaxşısı təzə, minimum emal olunmuş qidalara üstünlük vermək, yarımfabrikatlardan və ya sənaye üsulu ilə istehsal olunmuş hazır qidalardan uzaq durmaqdır.

Gəncliyi qorumağa kömək edən digər vərdişlər sırasında həkim qidanı yaxşıca çeynəməyi, kifayət qədər yatmağı, orqanizmdə su balansını qorumağı və müntəzəm fiziki məşqlərlə məşğul olmağı vurğulayıb.