Suriya əhalisi Ermənistandan 49 milyon dram (təxminən 123 min dollar) məbləğində humanitar yardımın ikinci partiyasını alacaq.

Axar.az xəbər verir ki, bu barədə müvafiq qərar Ermənistan hökumətinin bu gün keçirilən iclasında qəbul edilib.

Qeyd olunub ki, bu məbləğ hökumətin ehtiyat fondundan Daxili İşlər Nazirliyinin Xilasetmə Xidmətinə ayrılacaq:

“Humanitar yardım çərçivəsində Ermənistan hökuməti Suriya xalqının əsas sosial-iqtisadi ehtiyaclarını ödəmək üçün onları ərzaq və dərmanla təmin edəcək”.

Xatırladaq ki, İrəvan Suriyaya ilk humanitar yardımı martın 21-də göndərib. Bu məqsədlə Ermənistan-Türkiyə sərhədindəki Marqara keçid məntəqəsi 10 gün müddətinə açılmışdı.