Çin sədri Si Szinpinin ordusuna 2027-ci ilə qədər Tayvanı işğal etməyə hazır olmağı əmr etdiyi güman edilir. Müharibəyə hazır olmaq müharibəyə başlamaq demək deyil.

Axar.az xəbər verir ki, bu barədə “Nyu York Tayms” nəşri yazıb.

Nəşr bildirir ki, bəzi analitiklər Çinin yaxın illərdə böyük müharibə apara biləcəyinə şübhə edirlər. Belə ki, Pekin son vaxtlar yüksək səviyyəli hərbi rəhbərləri arasında bir neçə təmizləmə dalğası həyata keçirib. Xüsusilə, son iki ildə iki müdafiə naziri və Xalq Azadlıq Ordusunun bir sıra yüksək vəzifəli şəxsləri, o cümlədən Raket Qüvvələrinin yüksək rütbəli komandirləri vəzifələrindən azad edilib.

Qeyd olunur ki, bu problemlər Szinpinin Tayvanı ələ keçirmək ambisiyalarını zəiflədə bilər. Çin ordusu son onilliklərdə əhəmiyyətli dərəcədə modernləşib və həqiqətən də ABŞ-a meydan oxumağa qadir olsa da, qələbə üçün təkcə silah kifayət deyil.