Ağ Evin mətbuat katibi Karolina Levitt Milli Təhlükəsizlik Şurası, Maliyyə Departamenti və Dövlət Departamentindəki yüksək vəzifəli rəsmilərə İrana qarşı sanksiyaların tətbiqi ilə bağlı bütün işlərin dayandırılması barədə məlumat verib.

Axar.az xəbər verir ki, bu barədə “Voll Strit Jurnal” Ağ Evdəki mənbəyə istinadla məlumat yayıb.

Mənbənin məlumatına görə, ABŞ Prezidenti Donald Trampın İrana maksimum təzyiq tətbiq etmək siyasəti dondurulub. Bildirilib ki, Tramp bu strategiyadan 2017-2021-ci illərdə də istifadə edib və yanvarda Ağ Evə qayıtdıqdan sonra onu bərpa edib.

Ağ Evin mətbuat katibinin müavini Anna Kelli nəşrə açıqlamasında məlumatı təkzib etməyib və bildirib ki, sanksiyalarla bağlı bütün yeni qərarlar ya Tramp administrasiyası, ya da müvafiq qurumlar tərəfindən elan ediləcək.

Qeyd edək ki, ABŞ İrana qarşı son sanksiyanı may ayında tətbiq etmişdi.