Qırğızıstanın həbsdə olan sabiq lideri Almazbek Atambayev vəsatət verərsə, ona amnistiya verilə bilər.

Axar.az xəbər verir ki, bunu Qırğızıstan Prezidenti Sadır Japarov deyib.

“Məhkəmənin qərarını heç kim dəyişdirə bilməz. Hətta mənim buna haqqım yoxdur. Mənim başqa hüququm var, amnistiya hüququm. Müvafiq ərizə ilə müraciət etsələr, amnistiya verə bilərəm. Koy-Taş hadisələrindən 6 il keçir. Bütün bunlar keçmişdə qaldı. Məncə, məhkəmə bu qədər sərt olmaya bilərdi. Amma digər tərəfdən həmin hadisələrdə bir nəfər həlak olub. Yüzə yaxın insan yaralanıb. Məhkəmənin sərt və ya yumşaq qərarı nə olursa olsun, qanun çərçivəsində verilir. Biz bunu həyata keçirməyə borcluyuq”, - o bildirib.

Qeyd edək ki, Qırğızıstan paytaxtının Pervomayski rayon məhkəməsi Atambayevi qiyabi olaraq 11,5 il müddətinə azadlıqdan məhrum edib. O, Çuy rayonunun Koy-Taş kəndində qanunsuz torpaq sahələri əldə etməkdə, Bişkek İES-in modernləşdirilməsi zamanı korrupsiyada və 2019-cu il avqustun 7-8-də Koy-Taş kəndində kütləvi iğtişaşlar təşkil etməkdə təqsirli bilinib.