İyunun 3-5-də Ermənistan Müdafiə Nazirliyinin inzibati kompleksində Ermənistan-NATO tərəfdaşlığını əlaqələndirən “Planlaşdırma və baxış prosesi” sənədinin icrasının qiymətləndirilməsi üzrə işçi qrupların növbəti görüşü keçirilib.

Axar.az xəbər verir ki, bu barədə Müdafiə Nazirliyi məlumat yayıb.

Sənəddə nəzərdə tutulan tərəfdaşlıq məqsədlərinin həyata keçirilməsi prosesi müzakirə edilib, gələcək addımlar formalaşdırılıb.

İşçi qrupların sessiyasında Ermənistan Müdafiə və Xarici İşlər nazirliklərinin və NATO-nun müvafiq strukturlarının nümayəndələri iştirak ediblər.

Sessiyanın işinə yekun vuran Ermənistan MN-in Müdafiə Siyasəti və Beynəlxalq Əməkdaşlıq İdarəsinin rəisi Levon Ayvazyan və NATO-nun Müdafiə və Təhlükəsizlik üzrə Əməkdaşlıq Direktorluğunun direktoru Pyers Kazalet tərəfdaşlığın səviyyəsini yüksək qiymətləndirib və əməkdaşlığın inkişaf etdirilməsinə hazır olduqlarını bir daha təsdiqləyiblər.