Yaxın keçmişdə ABŞ Prezidenti Donald Tramp Rusiya lideri Vladimir Putinə Ukraynaya qarşı aparılan müharibədə atəşkəs üçün olduqca "cəzbedici" şərtlər təklif edib. Belə bir fasilə işğalçılara özlərini bərpa etməyə imkan verməklə yanaşı, bəzi sanksiyaların aradan qaldırılması və Moskva ilə Vaşinqton arasında münasibətlərin normallaşması üçün də şans yarada bilərdi.

Axar.az xəbər verir ki, bunu britaniyalı politoloq Lourens Fridman “Foreign Affairs” nəşrində yazıb.

Onun fikrincə, Rusiya rəhbərinin atəşkəslə razılaşmaması üçün bir neçə səbəbi ola bilər:

“Birincisi, onun üçün Ukraynadan daha vacib məsələ yoxdur. Bu ölkənin heç vaxt Rusiyadan tam asılı olmayacaq şəkildə müstəqil ola bilməməsini təmin etmək onun siyasi irsi baxımından böyük əhəmiyyət kəsb edir. Bundan əlavə, o, bu müharibəni uduzulacaq müharibə hesab etmir. Son 18 ay ərzində Rusiya qoşunlarının irəliləyişinin son dərəcə yavaş olmasına baxmayaraq, o düşünür ki, Rusiyanın ümumi güc üstünlüyü sonda həlledici olacaq və nəticədə Ukrayna Rusiya hərbi qüvvələri tərəfindən tam məğlub ediləcək”.