ABŞ prezidenti bir neçə gün əvvəl bəyan edib ki, daha sərfəli bir razılaşma əldə olunmasa, 1 avqustdan Avropa Birliyindən idxal edilən mallara 30 faiz gömrük rüsumu tətbiq ediləcək. Bu həftə Avropa Birliyinin rəsmi şəxsləri cavab tədbirləri planını yenidən işləyib hazırlamaqla məşğul olublar.

Axar.az xəbər verir ki, bununla bağlı “Nyu York Tayms” nəşri analitik yazı dərc edib.

Nəşrin müəllifləri qeyd edirlər ki, ABŞ ilə yeni razılaşma üzrə danışıqlar uğursuzluğa düçar olacağı təqdirdə 100 milyard dollardan çox dəyərində Amerika idxalına qarşı rüsumların tətbiqinə əsas yaradan addımlar atılacaq.

“Lakin bütün bu səyləri kölgədə qoyan mühüm bir sual mövcuddur: Əgər vəziyyət bu yerə gəlib çıxsa, onlar doğrudan da bu addımı atacaqlarmı?”, – deyə Atlantik Şurasının Avropa Mərkəzindən tədqiqatçı Frensis Barvell vurğulayıb.

Qəzet xatırladır ki, daha əvvəl AB-yə üzv olan 27 ölkənin nümayəndələri aylarla cavab tədbirləri planı üzərində çalışıblar, lakin danışıqların davam etməsi məqsədilə bu tədbirlərin icrası təxirə salınıb. Daha əvvəl, aprel ayında Avropa Birliyi Amerika mallarına təxminən 25 milyard dollar dəyərində gömrük rüsumlarının tətbiqini nəzərdə tutan planı təsdiqləmişdi. Lakin Tramp bəzi əvvəlki rüsumları ləğv etdikdən sonra bu plan “xoşməramlılıq əlaməti olaraq” dayandırılmışdı.

Bildirilir ki, razılaşma baş tutmayıb. Əksinə, Tramp sosial şəbəkələrdə AB mallarına qarşı 30 faiz gömrük rüsumlarının tətbiqi planlarını elan edib:

“Məhz bu açıqlamadan sonra AB rəsmiləri cavab tədbirləri çərçivəsində nəzərdə tutulan ilk mərhələ rüsumlarını yenidən təxirə salmaq qərarına gəldilər, bu tədbirlərin qüvvəyə minməsi yalnız 14 iyuladək dayandırılmışdı – əlavə danışıqlara imkan yaratmaq üçün. Lakin onlar eyni zamanda bildiriblər ki, zərurət yaranarsa, qətiyyətli şəkildə cavab verəcəklər”.