İranda su və elektrik enerjisi böhranının dərinləşməsi ilə eyni vaxtda İran inqilabının rəhbəri Ruhullah Xomeyninin hakimiyyətinin ilk günlərində vətəndaşlara verdiyi vədlər yenidən gündəmə gəlib.

Axar.az xəbər verir ki, bu haqda yerli sosial media fəalları paylaşımlar ediblər.

“Su, qaz və elektrik enerjisi bütün vətəndaşlar üçün pulsuz olacaq, neft gəlirlərini insanlar süfrələrində hiss edəcək və görəcəklər”, - Xomeyninin bu sözləri İran şəhərlərinin küçələrində yenidən divarlara yazılıb.

Vətəndaşlar bu vədləri yenidən yada salmaqla islam respublikasının onları aldatdığına diqqət çəkiblər.

Xatırladaq ki, Xomeyni 1979-cu ildə hakmiyyətə gəlməzdən əvvəl və gələndən sonra yuxarıda qeyd olunan vədləri vermiş, bunun reallaşmayacağı təqdirdə İranı islam ölkəsi adlandırmağın mümkün olmadığını bildirmişdi.

O, bununla yanaşı bütün vətəndaşların qısa müddətdə pulsuz olaraq mənzillərlə də təmin olacağına söz vermişdi.

Qeyd edək ki, xüsusən son illər İranda su və elektrik enerjisi qıtlığı böhran həddinə çatıb, bir çox bölgələrdə su və elektrik kvota ilə verilir.