Avropa Birliyi ABŞ-a qarşı 93 milyard avroluq əks rüsumlardan ibarət tədbirlər paketi hazırlayıb.

Axar.az xəbər verir ki, bu barədə Avropa mətbuatında məlumat yayılıb.

Qeyd olunub ki, bu, ABŞ Prezidenti Donald Trampın AB məhsullarına qarşı avqustun 1-dən tətbiq edəcəyi yeni və yuxarı gömrük rüsumları ilə bağlı razılığın əldə olunmayacağı təqdirdə baş verə bilər.

ABŞ məhsullarına qarşı 30 faizədək nəzərdə tutulan gömrük rüsumlarının siyahısı 27 üzv ölkə arasında razılaşdırılıb. ABŞ ilə bu məsələdə razılıq əldə olunmazsa, cavab tədbirləri avqustun 7-dən tətbiq oluna bilər.

Hazırda AB və ABŞ transatlantik ticarət münaqişəsinin daha da alovlanmasının qarşısını almaq üçün danışıqları davam etdirir.

Avropa Komissiyası ABŞ ilə razılığa gəlmək üçün bütün səyləri göstərdiyini və kompromisin əldə olunacağına inandığını açıqlayıb.