İran İslam İnqilabı Keşikçiləri Korpusu (SEPAH) komandirinin müavini Hüseyn Salami son günlərdə ölkənin şimal-qərbində təhlükəsizlik qüvvələrinə istiqamətli hücumlarla bağlı İraq Kürd Regional Rəhbərliyinə (İKBY) xəbərdarlıq edib.

Axar.az xəbər verir ki, paytaxt Tehranda Qüds Günü münasibəti ilə təşkil olunan mərasimdə danışan Salami hərbi əməliyyatları istisna etməyib:

"İraqın şimalındakı siyasi səlahiyyətlilərə öhdəliklərinə sadiq qalmaları barədə xəbərdarlıq edirəm. İrana təhlükə gətirə bilən hər nöqtəni heç tərəddüd etmədən yox edəcəyik".

Salami bölgədəki bəzi dövlətlərin təhlükəsizlik qüvvələrinə qarşı təşkil olunan hücumlara dəstək verdiyini iddia edib.

Xatırladaq ki, İranın şimal-qərbindəki bölgələrdə 15 iyundan etibarən İ-KDP peşmərgələri və İran əsgərləri arasında başlayan qarşıdurmalarda hər iki tərəfdən onlarla adam həyatını itirib.

Bölgədəki qarşıdurmalardan sonra İran ordusu İKBY-nin Ərbil şəhərinə bağlı Soran mahalındakı dağlıq bölgəni bombardman edib.