Azərbaycanlı qızlar çox mehribandır, səmimidir, onlarla ünsiyyət məndə çox asan alınır. Tam səmimiyyətimlə deyim ki, bunu çox istəyərdim. Hətta mən Azərbaycana gəldiyim gündən bu barədə düşünürəm. Çünki onlar şirin, gözəl, qayğıkeşdirlər. İnşallah, azərbaycanlı qızla evlənəcəm.

Bu sözləri Azərbaycanda təhsil alan nigeriyalı tələbələrlə söhbətimizdə eşitdik. Əcnəbi tələbələrin Azərbaycandakı güzəranı ilə maraqlanmaq məqsədilə onların ən çox maraq göstərdiyi universitetlərdən birinə – Azərbaycan Dövlət İqtisad Universitetinə yollandıq. Universitetin müəllim heyətinin köməyi ilə əcnəbi tələbələrlə görüş baş tutdu.

Axar.az-ın təşkil etdiyi görüşdə əsas məqsəd əcnəbi tələbələrin Azərbaycanda oxumaq istəklərinin səbəbini öyrənmək, burada təhsildə yaranan çətinliklərlə maraqlanmaq, təhsil fərqi, karyera imkanları ilə tanış olmaqdır.

Bizimlə həmsöhbət olan ilk tələbə əvvəlcə bir qədər həyəcanlansa da, sonradan sözləri ilə bizi də, dostlarını da güldürdü:

- Adım Tomidir. Nigeriyadan gəlmişəm. Artıq 2 ildir Azərbaycandayam. Burada ali təhsil almaq çox da çətin deyil.

Ondan niyə məhz Azərbaycanda təhsil almaq istəməsinin səbəbini soruşuram:

- Nə danışım, bilmirəm (gülür).

Kənardan dostları ona həyəcanlanmaması üçün dəstək olurlar. Tomi davam edir:

- İnternetdən Azərbaycanı tapdım, haqqında kifayət qədər məlumat topladım. Məsələn, ölkə əhalisinin psixologiyası, mədəniyyəti ilə maraqlandım və düşündüm ki, burada təhsil almaq olar. Burada mənə rahatdır.

Nigeriya ilə Azərbaycandakı təhsil sistemini müqayisə etdikdə görürəm ki, gözəçarpacaq dərəcədə fərq yoxdur. Tək fərq müəllim heyətidir. Məsələn, mənim Azərbaycan dili müəlliməm Elfira xanım çox yaxşı insandır. O, mənə Azərbaycan dilini öyrətdi. Bu gün sizinlə belə rahat ünsiyyət qururamsa, bunu Elfira xanıma borcluyam.

Burada çoxlu dostlarım var. Onlar həm azərbaycanlı, həm də nigeriyalıdır. Dərsdən sonra onlarla toplaşır, maraqlı əyləncələr təşkil edirik. Ən çox Tarqovunu (Nizami küçəsini) bəyənirəm. Orada axşamlar çox gəzirik.

İstəyirəm ki, məktəbi bitirdikdən sonra ölkənizdə qalıb işləyəm. Amma əlbəttə ki, bunu Allah bilər (gülür).

- Azərbaycanlı xanımla münasibət qurmaq və yaxud onunla ailə qurmaq barədə düşünmüsünüzmü? Bunu istəyərdiniz?

Sualımdan sonra otağı nigeriyalı tələbələrin gülüşü götürür:

Tomi: "Çox yaxşı sualdır, istəyərdim, çox maraqlı olardı (gülür)."

Keçirik Elvis Felekesə. Elvis də özü və təhsili haqda danışır:

- Artıq 2 ildir ki, Azərbaycandayam. Buranı seçməkdə əsas məqsədim Nigeriya sərhədlərindən kənarda təhsil almaq idi. Nigeriya təhsili ilə buradakı təhsili müqayisə etdikdə görürəm ki, burada sistem çox asan və dəqiq qurulub. Məsələn, səhər dərsə gedib, günorta evə qayıdırıq. Amma Afrikada bu sistem qurulmayıb. Dərslərin müddəti fərqlidir.

Elvis burada çalışmaq istədiyini, amma xarici vətəndaş olduğu üçün çətinlik çəkdiyini deyir:

- Çox istəyərdim ki, dərsdən sonra haradasa çalışım, amma xarici vətəndaşlar üçün həftəlik cəmi 20 saatlıq limit olduğundan bu arzumu reallaşdıra bilmirəm (gülür).

- Bəs oxuyub bitirdikdən sonra burada qalıb karyera qurmaq istəyərdinizmi?

- Belə bir şeyi çox arzulayıram. Əgər qarşıma belə bir fürsət çıxsa, bunu dəyərləndirmək istəyərdim. Arzuladığım işi tapsam, təhsilimi bitirdikdən sonra burada yaşayıb, işimi qurmağı düşünürəm. Dərsdən sonra evə gedirəm. Adətən gitarada ifa edib, mahnı oxuyuram. Dərsdən sonrakı istirahətimi bu təşkil edir. Musiqi mənim həyatımdır.

Müəllimlərimə gəlincə, öncə Rəna xanımdan danışmaq istəyirəm. Sağ olsun, o, bizə çox kömək etdi. Sonra Azərbaycan dili müəlliməmi çox sevirəm. Bir də Sara müəllimə var, o, məni hərdən sevir, hərdən isə yox (gülürlər).

Ölkəmizdə təhsil almaq Əsli Hacıyevanın (özbəkistanlı tələbə - əslən azərbaycanlıdır) arzusu olub:

- Uzun müddətdir Azərbaycanda təhsil almaq barədə düşünürdüm. Çünki burada təhsil alan tələbələrin yaxşı potensialı olması barədə məlumatım var idi. Burada qiymətlər çox münasibdir. Mənim üçün aylıq büdcəmi xərcləmək kifayət edir. Demək olar ki, heç bir çətinlik çəkmirəm.

Masanın o biri tərəfindən nigeriyalı tələbələrdən biri – Maykl dərsə tələsdiyini, onunla söhbətimizi digər tələbələrdən tez etməyimizi xahiş edir:

"Mən Nigeriya Federativ Respublikasından gəlmişəm. Azərbaycanda oxumağı ona görə seçdim ki, burada oxuyan dostlarımdan biri bunu mənə tövsiyə etdi. Bir dəfə internetdə Azərbaycanda təhsil alan nigeriyalı tələbə dostumla danışırdım. O, məndən nə üçün Azərbaycanda təhsil almadığımı soruşdu. Mənə izah etdi ki, burada təhsil, yaşamaq çox rahatdır. Bu sözlərdən sonra burada təhsil almaq qərarı verdim. Nigeriya təhsil sistemi ilə buradakı sistemdə böyük fərq var. Burada bizi praktikaya göndərmirlər. Dərslər daha çox nəzəriyyə üzərində keçirilir, amma Nigeriyada üstünlük praktikaya verilir. Çox istəyərdim ki, dərslər praktika üzərində qurulsun.

Universiteti bitirdikdən sonra burada qalıb çalışmaq istəyərdim. Əgər şərtlər yaxşı olsa, qalıb burada çalışmağı düşünürəm. Çünki bura sülhsevər ölkədir.

Söhbətimiz bitən kimi Maykl üzrxahlıq edir və getməli olduğunu deyir. Otağı tərk edəndən bir neçə saniyə sonra geri qayıdır və mənə etirazını bildirir:

- Siz niyə Tomiyə verdiyiniz sualı mənə də vermədiniz?! Niyə soruşmadınız mən azərbaycanlı xanımla evlənərəm, ya yox?!

Hamını gülmək tutur…

Sualımı Maykl üçün də təkrar edirəm, çox maraqlı cavab verir:

- Azərbaycanlı qızlar çox mehribandır, səmimidir, onlarla ünsiyyət məndə çox asan alınır. Tam səmimiyyətimlə deyim ki, bunu çox istəyərdim. Hətta mən Azərbaycana gəldiyim gündən bu barədə düşünürəm. Çünki onlar şirin, gözəl, qayğıkeşdirlər. İnşallah, azərbaycanlı qızla evlənəcəm.

Söhbətə Felekes də müdaxilə edir:

- Mən də bu ölkədən olan bir xanımla evlənmək istəyirəm (gülür).

Keçid alırıq Viktora:

"AdımViktor Damola. Yarı Nigeriyalı, yarı azərbaycanlı. Naxçıvanlıyam (gülürük). Azərbaycanı çox xoşlayıram, yaxşıdır, pis yer deyil. Artıq 2 il 3 aydır Azərbaycandayam. Mənim bir dostum var, o da nigeriyalıdır. 8 ildən çoxdur burada yaşayır. Evlidir. O mənə Azərbaycan haqqında həmişə danışırdı. Gəldim və gördüm ki, yaxşı yerdir. Nigeriya ilə Azərbaycan təhsil sistemini müqayisə edəndə çox fərq olduğunu demək olar. Bilirsiniz, Nigeriyada oxumaq çox çətindir. Orada ancaq oxumaqdır, amma burada maraqlı şeylər daha çoxdur. Hamısı ağ baladır, mən qarabalayam (gülürük).

Viktor müğənni olduğunu deyir. Bildirir ki, onun əlavə məşğuliyyəti universitetin tədbirlərində çıxış etməkdir. O, tələbələr arasında keçirilən musiqi festivalında birinci yeri qazananlardandır.

Ondan bizim üçün Azərbaycan xalq mahnısı olan "Sarı gəlin"i ifa etməyi xahiş edirik. (İfanı təqdim etdiyimiz videoçarxda izləyə bilərsiniz).

Əcnəbi tələbələr arasında əslən azərbaycanlı olan, amma qonşu ölkələrdə doğulub, boya-başa çatan tələbələr də var. Onlar Ofeliya Məmmədova, Elman Süleymanov, Qaragöz Hacıyevadır. Onlarla da söhbətimizdən bəlli olur ki, burada oxumaq çox asandır.

Sonda Universitet rəhbərliyi ilə kiçik söhbət edirik. Onlardan əcnəbi tələbələrin ölkənin tarixi yerlərilə tanışlığı barədə soruşuruq.

Suallarımızı UNEC-in Beynəlxalq Əlaqələr Departamentinin xarici tələbələr üzrə böyük inspektoru Rəna Naibova və UNEC-in Beynəlxalq Əlaqələr Departamentinin direktor müavini Anar Kazımov cavablandırır.

Universitetdən bildirdilər ki, əcnəbi tələbələr ötən il Nar bayramında Göyçayda, İsmayıllıda, Lahıcda olublar. Ümumilikdə isə universitet rəhbərliyi əcnəbi tələbələrlə ölkə turlarına tez-tez çıxır. Bu barədə universitetin yeni layihələri də olacaq.

Sonda Azərbaycan Dövlət İqtisad Universitetinin rəhbərliyinə və müəllim heyətinə bizə yaratdığı şəraitə görə təşəkkür edirik!