Jurnalist Mahal İsmayıloğlu aprelin 3-ü Türkiyədə əməliyyat olunacaq.

Aprelin 2-də "Media forum" saytına açıqlamasında Mahal İsmayıloğlu deyib ki, hazırda Türkiyənin Qaziantep Universitetinin tibb fakültəsi xəstəxanasındadır: "Həyat yoldaşım da yanımdadır. Böyrək xəstəliyindən əziyyət çəkirəm. Böyrəyimdən əməliyyat olunacam".

Mahal İsmayıloğlu bildirib ki, o, əməliyyata maddi yardım göstərilməsi üçün Azərbaycan dövlətinə müraciət etsə də, bu, nəticə verməyib, ona görə də əməliyyat üçün lazım olan 12 min ABŞ dollarına yaxın pulu borc alıb düzəldib.

Mahal İsmayıloğlu 1957-ci ildə Qərbi Azərbaycanda anadan olub. Bakı Dövlət Universitetinin jurnalistika fakültəsini bitirib. Yerevanda çap olunan "Sovet Ermənistanı" qəzetində işləyib. "Aydınlıq" qəzetinin qurucularından biridir, 1990-95-ci illərdə bu qəzetdə çalışıb. 1995-2002-ci illərdə "Xalq qəzeti"nin baş redaktoru olub. Hazırda müstəqil jurnalist kimi "Yeni Müsavat"qəzetində köşə yazıları ilə çıxış edir.