Ana səhifə Sağlıq |
Ağız və diş sağlamlığı ölkəmizdə və dünyada ən əhəmiyyətli sağlamlıq problemlərindən biridir.
Axar.az xəbər verir ki, isti, soyuq, şəkərli, turş qidalar və içkilər ağıza alındıqda dişlərdə sürətli reaksiya və qıcıqlanma meydana gəlir.
Bu cür həssaslıq ən çox diş ətinin tənəzzülə məruz qalan kök səthlərindən qaynaqlanır. Dişi sərt və üfüqi fırçalamaq, sıxmaq kimi faktorlar həssaslıq problemlərini qaldırır. Xüsusi hazırlanmış diş məcunları və yumşaq tüklü fırçalar diş həssaslığına qarşı köməkçi ola bilər.
Eyni zamanda aldığınız qidaları diqqətlə seçməlisiniz. Tərkibində çox miqdarda turşu olan qidaların tez -tez istifadəsi nəticəsində mina təbəqəsi əriyir və həssaslıq artır.
Ağızda quruluq problemi isə tüpürcəyin azalması nəticəsində yaranır. Tüpürcək ağız yaxalama təsiri ilə çürük və diş əti infeksiyalarına qarşı qoruyucu rol oynayır. Quruluq çox ciddi problemdir. Burun tıxanıqlığı nəticəsində ağızdan nəfəs almaq, ağzıaçıq vəziyyətdə yatmaq ağız quruluğuna səbəb olur. Bu, diş ətlərində, xüsusən də ön bölgələrdə qanama kimi infeksiya yaradır. Bundan əlavə, yaş həddi və diabet xəstəliyi də ağızda quruluğa səbəb olur. Bu şikayətlər olduqda dərhal həkim rəyi alınmalıdır.
Diş daşları müəyyən bir müddət sonra diş tökülməsinə səbəb ola bilər. Tüpürcəyinizdəki minerallar dişlərdə meydana gələn bakteriya lövhəsinə yerləşdikdə diş daşları əmələ gəlir. Mütəmadi olaraq təmizlənməyən diş daşları diş əti iltihabı və diş əti xəstəliklərinə, görmə qabiliyyətinin pisləşməsinə, həmçinin ağız qoxusuna səbəb olur. İnfeksiya tez müalicə edilməzsə, dişləri əhatə edən sümük toxuması təsirlənir və dişlər dəstəkləyici toxumalarını itirir.
Ağızdakı infeksiya mənbələri diş əti iltihabı və çürük dişlər ola bilər. Əlavə olaraq, müalicə olunmayan çürüklər, ağıl dişləri, kök kanalının müalicəsindən sonra sağalmayan lezyonlar və qırılan köklər də infeksiya yarada bilər. Ürək əməliyyatları, ortopedik əməliyyatlar, kimyaterapiya, ilik nəqli kimi vacib müalicələrdən əvvəl ağızdakı bütün problemlər həll edilməlidir. Bu tətbiq iki baxımdan əhəmiyyətlidir. Birincisi, ağızdakı bu bakteriyalar qan dövranı ilə əməliyyat sahəsinə yayılaraq ciddi problemlərə səbəb ola bilər. İkincisi, belə çətin prosedurlardan sonra uzun müddət diş müalicəsinə icazə verilmir. Uzun müddətdə ağrı və abses kimi problemlərin qarşısını almaq üçün əvvəlcə onu həll etməyiniz məsləhət görülür.
Yaşlanma prosesində ağızda bütün bədəndə olduğu kimi fərqli dəyişikliklər görülür. Çeynəmə səmərəliliyi azalır. Daha da əhəmiyyətlisi, dişlərin uzunluğu qısalır. Uzun müddətdə ölçü dəyişikliyi nəticəsində alt üz qısalır və dodaq kənarları yıxılıb içəri girir. Digər yaşlanma təsiri dişlərin saralmasıdır. Zaman keçdikcə dişlər daha qaranlıq bir rəngə çalır.
Tarix
2021.09.26 / 16:29
|
Müəllif
Aytəkin Qardaşova
|