Hazırda uşaqlar arasında qızdırma, öskürək, halsızlıq kimi hallar artıb.

Axar.az xəbər verir ki, məsələ ilə bağlı Trend-ə açıqlama verən Səhiyyə Nazirliyinin ekspert-mütəxəssisi Erkin Rəhimov dəqiq hansı virusun bilinməsi üçün edipemioloji elmi tədqiqatlar aparılmalı və uşaqlardan tez-tez analizlər götürülməli olduğunu deyib:

"Bu cür tədqiqatlar çox ölkələrdə aparılmır və səbəb də odur ki, respirator virusların əlamətləri oxşar olur. Ancaq kliniki əlamətlərə əsaslanaraq demək olar ki, hazırda uşaqlarda müşahidə olunan əlamətlər RSV (respirator sinsitial virusu) virusunun əlamətlərinə daha çox oxşardır".

E.Rəhimov bildirib ki, bu viruslardan qorunmaq üçün maska taxmaq, təmizliyə riayət etmək, insanların çox sıx olduğu yerlərdə olmamaq lazımdır:

"Eyni zamanda virusa qarşı müqaviməti artırmaq məqsədilə immunitetin güclü olması üçün yuxu rejiminə, qida rasionuna diqqət etmək, idmanla məşğul olmaq lazımdır".